Effigies: Sanctus Marcus Crisinus

Marcus Crisinus

Sanctus Marcus Crisinus

Canonicus Strigoniensis, martyr Cassoviensis

Sacerdos Croata, seminarii Tyrnaviensis rector, anno 1619 Cassoviae cum duobus Iesuitis necatus quod ad Calvinismum transire noluit.

Circa annum 1588 Crisii, in Croatia, natus, Marcus Križin apud Iesuitas Vindobonae deinde Graecii studuit, ubi magistrum habuit Petrum Pázmány, et institutionem suam in Collegio Germanico et Hungarico de Urbe ab anno 1611 ad 1615 absolvit. Sacerdos dioecesis Zagrabiensis, a Pázmány, archiepiscopo Strigoniensi Tyrnaviae residente, vocatus est, qui eum seminarii rectorem et canonicum nominavit.

Ineunte anno 1619 missus est ad bona antiquae abbatiae de Széplak, prope Cassoviam, administranda. Mense Septembri copiae Calvinianae Georgii Rákóczi, Gabrieli Bethlen militantes, urbem ceperunt; comprehensus est cum Iesuitis Stephano Pongrácz et Melchiore Grodziecki. Praedium ecclesiasticum ei promissum est si fidem catholicam abnegaret; recusavit et, tormentis excruciatus, die 7 Septembris anni 1619 capite truncatus occubuit.

Cum duobus sociis anno 1905 Beatus renuntiatus, a Ioanne Paulo II Cassoviae die 2 Iulii anni 1995 in Sanctorum numerum relatus est. Tertius sanctus Croata, Crisii sub nomine Marko Križevčanin valde colitur; reliquiae eius inter Strigonium et Tyrnaviam divisae sunt.