Effigies: Sanctus Marcus Crisiensis

Marcus Crisinus

Sanctus Marcus Crisiensis

Canonicus Strigoniensis, martyr Cassoviensis

Sacerdos Croata Graecii et Romae institutus, canonicus Strigoniensis, anno 1619 Cassoviae cum duobus Iesuitis necatus quod fidem abiurare noluit; a Ioanne Paulo II anno 1995 in Sanctorum numerum relatus.

Marcus Krizin (Križevčanin) circa annum 1589 Crisii in familia nobili Croatica natus est. Iesuitarum alumnus Vindobonae et Graecii, studia in Collegio Germanico de Urbe prosecutus, sacerdos ordinatus est et ad serviendum archiepiscopo Strigoniensi, Hungariae primati, rediit, qui eum canonicum fecit eique administrationem abbatiae de Széplak, prope Cassoviam, commisit.

Mense Septembri anni 1619 copiae Calvinianae Gabrielis Bethlen, Transsilvaniae principis, Cassoviam occupaverunt. Marcus cum Iesuitis Melchiore Grodziecki et Stephano Pongrácz comprehensus est; iussi fidem abiurare, etiam tormentis adhibitis recusaverunt et die 7 Septembris anni 1619 necati sunt (vide sanctos martyres Cassovienses).

A Pio X anno 1905 Beati renuntiati, tres martyres a Ioanne Paulo II Cassoviae die 2 Iulii anni 1995 in Sanctorum numerum relati sunt. Croatia Marcum Crisiensem die 7 Septembris celebrat; urbs eius natalis eum patronum elegit.