Sacerdos dioecesis Sappensis, anno 1946 ad triginta annos laborum coactorum damnatus, post octo annos captivitatis moribundus liberatus et anno 1958 mortuus.
Anno 1887 in Suma, prope Nënshat, natus, Antonius (Ndoc) Suma in Pontificio Seminario Albanensi, deinde in Canisiano Oenipontano studuit et anno 1911 pro dioecesi Sappensi sacerdos ordinatus est. Parochus fuit in Koman, Kçirë, Nënshat, Naraç, Laç, Pistull et Plezhë.
In Laç die 8 Decembris anni 1946 comprehensus, octo post diebus ad triginta annos carceris et laborum coactorum damnatus est. Graviter aegrotus, mense Novembri anni 1954 liberatus est et in Pistull die 22 Aprilis anni 1958, ex captivitatis aerumnis, obiit.

















