Venerabilis Serva Dei Magdalena Delbrêl
Adiutrix socialis et mystica Ivriaci
Atheista viginti annos nata conversa, cum quibusdam sociis in suburbio communistico Ivriaci consedit ut ibi Evangelium inter «homines viarum» viveret.
Mussidani, in Petrocoriis, anno 1904 in familia ferriviariorum parum credentium nata, Magdalena Delbrêl septemdecim annos nata atheismum radicalem profitebatur. Amicorum christianorum consuetudine, possibilitatem Dei consideravit, orare coepit et die 19 Martii anni 1924 conversa est. Praeposita scautica, inter primas adiutrices sociales diplomate ornatas facta est.
Die 15 Octobris anni 1933 cum quibusdam amicis Ivriaci ad Sequanam, in urbe opificum cuius magistratus communistae erant, consedit ibique parvam communitatem laicarum, «Caritatem», condidit. Per triginta annos populo servivit, cum militantibus communistis colloquium habuit et carmina atque commentationes scripsit, inter quas Ville marxiste, terre de mission. Ivriaci die 13 Octobris anni 1964 obiit. Franciscus papa eam die 26 Ianuarii anni 2018 venerabilem declaravit.










