
Primus professus Missionariorum a Spiritu Sancto, sacerdos et director spiritualis Mexicopoli, anno 1934 Missionarias a Caritate Mariae Immaculatae condidit.
Moyses Lira Serafín die 16 Septembris anni 1893 Tlatempae, in municipio Zacatlán (Angelopolis), natus est; quinque annos natus matrem amisit et patrem, ludi magistrum, in eius migrationibus secutus est. Alumnus seminarii Palafoxiani Angelopolitani, anno 1914, invitante patre Felice a Iesu Rougier, recentissimam congregationem Missionariorum a Spiritu Sancto ingressus est, ex Operibus Crucis Conceptionis Cabrera de Armida ortam; die 4 Februarii anni 1917 primus eius professus fuit et die 14 Maii anni 1922 sacerdos ordinatus est.
Persecutione religiosa saeviente, Romae usque ad annum 1928 commoratus est, deinde Mexicopolim ad ministerium rediit, ubi ut confessarius et director spiritualis valde expetebatur. Die 29 Martii anni 1934 congregationem Missionariarum a Caritate Mariae Immaculatae condidit, catechesi et christianae puerorum familiarumque educationi deditam.
Mexicopoli die 25 Iunii anni 1950 obiit; exuviae eius in templo expiatorio nationali Sancti Philippi a Iesu quiescunt. Anno 2013 Venerabilis declaratus, die 14 Septembris anni 2024 in basilica Guadalupensi a cardinali Marcello Semeraro, nomine Francisci Papae, Beatus renuntiatus est.










