Ioannes Prassek, Hermannus Lange et Eduardus Müller, vicarii ecclesiae Sacratissimi Cordis Lubecensis, Hamburgi die 10 Novembris anni 1943 una cum Carolo Friderico Stellbrink, pastore Lutherano, supplicio affecti.
Ineunte bello tres iuvenes vicarii paroeciae Sacratissimi Cordis Lubecensis, Ioannes Prassek, Hermannus Lange et Eduardus Müller, coetus iuvenum et adultorum ad colloquia congregabant, in quibus radiophonia Britannica audiebatur et sermones episcopi Monasteriensis Clementis Augusti von Galen contra euthanasiam divulgabantur. Cum pastore Lutherano ecclesiae Sancti Lucae, Carolo Friderico Stellbrink, amicitiam iunxerunt.
Post Lubecae bombardationem nocte inter diem 28 et 29 Martii anni 1942, Stellbrink Dominica in Palmis praedicavit eam esse probationem a Deo missam; comprehensus est, deinde tres sacerdotes catholici et circiter viginti laici. A Iudicio Populi Lubecae mense Iunio anni 1943 iudicati, quattuor ecclesiastici capitis damnati et die 10 Novembris anni 1943 in carcere Hamburgensi, paucis minutis interpositis, securi gallica necati sunt; eorum sanguis, ut ferebatur, sub pegmate commixtus est.
Tres sacerdotes catholici Lubecae die 25 Iunii anni 2011 inter Beatos relati sunt, praesente Ecclesia Lutherana, quae simul Stellbrink commemoravit. Crypta commemorativa eis sub ecclesia Sacratissimi Cordis Lubecensi dicata est.











