Viginti quinque episcopi, sacerdotes, religiosae et laici Graeco-catholici sub regiminibus Sovietico et Nazistico inter annos 1935 et 1973 mortui, a Ioanne Paulo II Leopoli die 27 Iunii anni 2001 una inter Beatos relati.
Die 27 Iunii anni 2001, in liturgia Byzantina Leopoli coram plus quam decies centenis milibus fidelium celebrata, Ioannes Paulus II episcopum Nicolaum Čarneckyj et viginti quattuor socios inter Beatos rettulit, necnon eodem die episcopum Theodorum Romža, sacerdotem Aemilianum Kovč et religiosam Iosaphatam Hordaševska. Ita Ecclesiam Graeco-Catholicam Ucrainam honoravit, a potestate Sovietica anno 1946 exstinctam et usque ad annum 1989 clandestinam.
Coetus complectitur episcopos Nicolaum Čarneckyj, Gregorium Chomyšyn, Iosaphat Kocylovskyj, Simeonem Lukač, Ioannem Slezjuk, Nicetam Budka, Gregorium Lakota et Basilium Velyčkovskyj; exarchum Leonidam Fëdorov et archimandritam Clementem Šeptyckyj; sacerdotes Nicolaum Konrad, Andream Iščak, Romanum Lysko, Nicolaum Cehelskyj, Petrum Verhun et Alexium Zaryckyj; religiosos Severianum Baranyk, Ioachim Senkivskyj, Vitalem Bajrak, Zenobium Kovalyk et Ioannem Ziatyk; religiosas Tarsiciam Mackiv, Olympiam Bida et Laurentiam Harasymiv; cantorem Vladimirum Pryjma.
Alii in caedibus captivorum mensis Iunii anni 1941 vel a militibus interfecti sunt, alii in carceribus Leopolis, Kioviae et Vladimiri, in campis Vorkutae, Mordoviae, Irkutiae et Kazachstaniae, aut ex custodiae consectariis mortui sunt. Omnes unionem cum Roma abnegare recusaverant.










