Effigies: Sancta Maria a Iesu Sacramentato Venegas de la Torre

Sancta Maria a Iesu Sacramentato Venegas de la Torre

Infirmaria valetudinarii Sacri Cordis

Orba Zapotlanejensis, superiorissa generalis Filiarum Sacri Cordis Iesu Guadalaiarensium facta, per dimidium saeculum aegrotos curavit; prima Mexicana in Sanctorum numerum relata.

Maria Nativitas Venegas de la Torre die 8 Septembris anni 1868 in vico municipii Zapotlanejensis nata est, ultima ex duodecim liberis. Sedecim annos nata matre, paulo post patre orba, ab amita paterna recepta est; anno 1898 consociationi Filiarum Mariae vici sui nomen dedit.

Die 8 Decembris anni 1905, secessu peracto, Guadalaiarae parvo coetui Filiarum Sacri Cordis Iesu se adiunxit, quae aegrotos valetudinarii Sacri Cordis ab Athenogene Silva canonico conditi curabant; ibi infirmaria, rationum custos et pharmacopola fuit, et nomen Mariae a Iesu Sacramentato assumpsit. Anno 1912 vicaria, die 25 Ianuarii anni 1921 superiorissa generalis electa, constitutiones communitatis conscripsit, anno 1930 approbatas, et valetudinarium persecutione religiosa saeviente apertum servavit.

Guadalaiarae die 30 Iulii anni 1959 obiit. A Ioanne Paulo II die 22 Novembris anni 1992 Beata renuntiata, ab eodem die 21 Maii anni 2000 in Sanctorum numerum relata est, una cum Christophoro Magallanes et Sociis.