
Beata Marcellina Darowska
Conditrix Sororum Immaculatae Conceptionis Jazłoviensium
Vidua Podoliensis, Sororum Immaculatae Conceptionis confundatrix et superiorissa generalis facta, conventum Jazłoviensem in Galicia centrum fecit retis scholarum puellis destinatarum.
Marcellina Kotowicz die 16 Ianuarii anni 1827 in loco Szulaki, in Podolia, prope Camenecium, in familia nobilium possessorum nata est. Anno 1849 Carolo Darowski nupsit, sed anno 1852 maritum, deinde filium natu maximum amisit. Romam valetudinis curandae causa profecta, ibi Hieronymum Kajsiewicz, Resurrectionistam, convenit et cum Iosepha Karska sociata congregationem Sororum Immaculatae Conceptionis Beatae Mariae Virginis condidit, puellis educandis et familiarum christianae renovationi deditam.
Post mortem Iosephae Karska anno 1860 superiorissa generalis, anno 1863 domum principem Jazłovieci, hodie Iazlovets, prope Buczacz, constituit et multos conventus cum scholis in Galicia et in antiqua Polonia condidit. Mulier orationis gratiisque mysticis praedita, congregationem suam per dimidium saeculum rexit.
Jazłovieci die 5 Ianuarii anni 1911 obiit. Ioannes Paulus II eam Romae die 6 Octobris anni 1996 Beatam renuntiavit.








