
Beatus Iosaphat Chichkov
Assumptionista, educator et parochus Varnensis, martyr
Assumptionista eruditus et musicus, superior seminarii Iambolensis deinde parochus Varnensis, Serdicae anno 1952 glandibus traiectus.
Robertus Matthaeus baptizatus, Iosaphat Chichkov anno 1884 Philippopoli e familia catholica Latina natus est. Alumnus Assumptionistarum apud Kara-Agatch, prope Hadrianopolim, anno 1900 novitiatum ingressus est, Lovanii studuit et Mechliniae anno 1909 sacerdos ordinatus est. Professor in collegiis Philippopolitano et Varnensi, deinde seminarium Sanctorum Cyrilli et Methodii Iambolense rexit, utrique ritui patens, ubi una hebdomade Latine, sequenti Slavonice celebrabat.
Musicus, praedicator et paedagogus, Varnae circulum Franco-Bulgaricum plus quam centum quinquaginta sodalium moderatus est et saepe Exc.mum Roncalli excepit. Ab anno 1949 parochus paroeciae Latinae Varnensis, mense Decembri anni 1951 comprehensus et Serdicae die 11 Novembris anni 1952 glandibus traiectus est. Eius vita una sententia continetur quam anno 1930 scribebat: «Pro viribus nos sanctificare studemus, quin id appareat.»













