Sacerdos Germanus comitatus Glacensis, hodie Kłodzko, iuvenum cappellanus, ob contionem contra Nazistarum doctrinam comprehensus et Dachaviae mortuus.
Anno 1907 Glacii (Kłodzko) natus, in comitatu eiusdem nominis qui tunc ad archidioecesim Pragensem pertinebat, Gerardus Hirschfelder in consociatione iuvenum catholicorum Quickborn adolevit. Anno 1932 sacerdos ordinatus, vicarius Czermnae, deinde Habelschwerdt (Bystrzyca Kłodzka) fuit, ubi curam iuventutis suscepit.
Iuvenes contra dominationem regiminis Nazistici defendit. Post contionem qua eos reprehendit qui «fidem e corde iuventutis evellunt», anno 1941 a Gestapo comprehensus et Dachaviam deportatus est.
Ibi die 1 Augusti anni 1942 ex inedia et labore consumptus obiit. Monasterii Westfalorum anno 2010 beatificatus est; colitur tam in regione Glacensi, nunc Polonica, quam ab antiquis comitatus incolis in Germaniam profugis.










