Quattuor sacerdotes Fraternitatis Sacerdotum Operariorum Dioecesanorum, institutioni seminariorum alumnorum devoti: tres anno 1936 in Civitate Regali et in provincia Giennensi occisi, quartus anno 1938 in carcere Conchensi mortuus.
Fraternitas Sacerdotum Operariorum Dioecesanorum a Sacro Corde Iesu, saeculo XIX Dertosae a beato Emmanuele Domingo y Sol condita, seminaria in Hispania et in Mexico necnon Collegium Hispanicum de Urbe moderatur. Triginta fere eius sodales bello civili interfecti sunt. Quattuor una beatificati sunt; omnes tunc in seminariis vel pro vocationibus laborabant.
Franciscus Castor Sojo López, Madrigalejo (Cauriensi in provincia) natus, olim rector seminarii maioris Placentini, deinde administrator Pacensis, cantus Gregoriani peritus celeber, oeconomus seminarii Civitatis Regalis erat cum prope urbem nocte inter diem 12 et 13 Septembris anni 1936 glandibus plumbeis necatus est; Dertosae, in ecclesia Fraternitatis, quiescit.
Emmanuel Galcerá Videllet, anno 1877 Caseris in dioecesi Dertosana natus, olim vicerector Collegii Hispanici de Urbe, die 3 Septembris anni 1936 prope Ibros (Giennium) cum sacerdotibus seminarii Beatiensis glandibus plumbeis necatus est. Aquilinus Pastor Camberos, anno 1911 natus, anno 1935 ordinatus, professor in seminario Beatiensi, Ubedae die 28 Augusti anni 1936 occisus est. Aemilianus Garde Serrano, anno 1876 in oppido Vara de Rey (Concha) natus, moderator spiritualis plurimorum seminariorum probatus, ex malis tractationibus in carcere Conchensi passis die 7 Iulii anni 1938 obiit.
Marcellus cardinalis Semeraro eos nomine Francisci papae die 30 Octobris anni 2021 in ecclesia cathedrali Dertosana beatificavit, prima beatificatione in ea urbe celebrata: «Martyrium non quaesiverunt, nam martyrium non quaeritur, sed patitur; cum autem tempus advenit, sanguine suo Christo testimonium reddere non dubitaverunt.»














