Stephanus abbas et ducenti monachi monasterii Sancti Petri de Cardeña, prope Burgos, secundum traditionem ab expeditione Saracenica saeculo IX vel X trucidati.
Secundum traditionem Caradignae servatam, exercitus emiratus Cordubensis, contra regnum Legionense bellum gerens, ad monasterium Sancti Petri de Cardeña pervenit monachosque Islamismum amplecti iussit. Illis recusantibus, Stephanus abbas eiusque ducenti monachi iugulati sunt et monasterium deletum. Dies incertus est: traditio localis annum 872 tenet, alii fontes annum 834 vel 953.
Martyres in claustro sepulti sunt, quod exinde claustrum Martyrum appellatur. Eorum cultus, inscriptionibus et narrationibus abbatiae testificatus, a Clemente VIII anno 1603 permissus est, eorumque festum ad diem 6 Augusti statutum. Monasterium, restitutum et hodie a Cisterciensibus habitatum, etiam celebre est quod familiam Cidi hospitio excepit.







