Professor et rector Universitatis Iagellonicae, conditor Ancillarum Sacratissimi Cordis Iesu, deinde per quinque et viginti annos episcopus Premisliensis.
Filius agricolarum Korczynensium, prope Crosnam, Iosephus Sebastianus Pelczar Premisliae anno 1864 sacerdos ordinatus est, deinde Romae studuit, ubi doctoratum theologiae adeptus est. Per viginti duos annos professor in Universitate Iagellonica Cracoviensi, eius rector annis 1882-1883 fuit et multa opera theologica et spiritualia edidit.
Actioni sociali valde deditus, anno 1894 Cracoviae congregationem Ancillarum Sacratissimi Cordis Iesu condidit, aegrotis, pauperibus et famulis deditam. Episcopus auxiliaris ac deinde ab anno 1900 episcopus Premisliensis, paroecias suas visitavit, scholas et opera caritatis multiplicavit et synodum dioecesanam coegit.
Premisliae die 28 Martii anni 1924 obiit. Ioannes Paulus II eum Resoviae anno 1991 Beatum renuntiavit et Romae anno 2003 in Sanctorum numerum rettulit.







