Effigies: Sanctus Ceddus

Ceddus

Sanctus Ceddus

Episcopus Orientalium Saxonum

Monachus Lindisfarnensis, sancti Ceaddae frater, Mediterraneos Anglos deinde Orientales Saxones evangelizavit, quorum episcopus fuit.

In Northumbria natus, Ceddus unus ex duodecim iuvenibus Anglis fuit quos sanctus Aidanus Lindisfarnae instituit; tres eius fratres, inter quos sanctus Ceadda, et ipsi sacerdotes erant. Anno 653 cum tribus sociis ad Mediterraneos Anglos evangelizandos profectus est, rogatu Peadae principis eorum. Paulo post Sigberctus, rex Orientalium Saxonum, in Northumbria baptizatus, eum in regnum suum vocavit.

A Finano Lindisfarnensi episcopus Orientalium Saxonum consecratus, communitates in Ythancaestir, hodie Bradwell-on-Sea, et Tilaburgi condidit. Sacellum Sancti Petri super Murum, quod lapidibus castelli Romani aedificavit, adhuc stat. Dum patriam suam visitat, monasterium quoque Laestingaeu in Eboracensium ericetis condidit.

In synodo Pharensi anno 664 interpres fuit inter fautores usuum Hibernicorum et usuum Romanorum, et his se adiunxit. Paulo post Laestingaeu peste obiit, die 26 Octobris anni 664; triginta monachi ex Orientalibus Saxonibus advecti ut eum lugerent ibi cum eo obierunt.