
Puella Orgosolensis, Actionis Catholicae sodalis, quindecim annos nata a iuvene sui pagi, qui eam violare volebat, occisa est.
Die 21 Iunii anni 1919 Orgosoli, in media Barbagia, nata, secunda ex decem liberis custodis agrorum, Antonia Mesina iam ab infantia Iuventuti Femininae Actionis Catholicae adscribitur, deinde ab anno 1934 ut sodalis effectiva.
Mane diei 17 Maii anni 1935, post Missam, cum vicina ad ligna in agris colligenda proficiscitur. Iuvenis eius pagi eam seorsum trahit et violare conatur; cum illa resistat, eam lapidibus interficit. Nondum sedecim annos nata erat. Interfector capitis damnatur et anno 1937 glandibus traicitur.
Armida Barelli mox Pio XI puellae casum ut «primum florem» martyrem Iuventutis Femininae proponit. Ioannes Paulus II eam die 4 Octobris anni 1987, una cum Petrina Morosini, beatam declarat. Eius exuviae in crypta ecclesiae paroecialis Orgosolensis venerantur.



