Nicanor Ascanio
Sanctus Nicanor Ascanio
Franciscalis, martyr Damascenus
Franciscalis anno 1835 e conventu suo expulsus, cappellanus Conceptionistarum Araniuezensium, ad vitam religiosam reversus ut in Terram Sanctam proficisceretur, Damasci anno 1860 interfectus.
Nicanor Ascanio Soria anno 1814 in Villarejo de Salvanés, ad meridiem et orientem Matriti, natus est. Franciscalis, ordinibus religiosis anno 1835 suppressis e conventu suo expulsus, in clero saeculari sacerdos ordinatus est et cappellanus monialium Conceptionistarum Araniuezensium factus; secundum traditionem Franciscalem, soror Patrocinio religiosa ei martyrium praedixisse fertur.
Cum collegium Franciscale Priegense, in provincia Conchensi, ad missionarios Terrae Sanctae instituendos restitutum esset, ibi habitum resumpsit. Valentia die 25 Ianuarii anni 1859 cum pluribus sociis profectus, Ioppen die 19 Februarii appulit et conventum Damascenum petiit ut linguam Arabicam disceret. Ibi nocte inter diem 9 et 10 Iulii anni 1860, sex et quadraginta annos natus, interfectus est. Unus ex undecim martyribus Damascenis, anno 1926 Beatus renuntiatus et anno 2024 in Sanctorum numerum relatus est; reliquia in ecclesia vici eius natalis veneratur.







