Beati Ioannes Baptista Turpin du Cormier et Socii
Martyres Lavallenses
Quattuordecim sacerdotes Lavalli die 21 Ianuarii anni 1794 securi gallica necati et quinque alii martyres, quattuor feminae et unus sacerdos, eodem anno in Meduana morte affecti; Pius XII eos anno 1955 inter Beatos rettulit.
Ineunte anno 1794 commissio revolutionaria Lavalli constituta sacerdotes iusiurandum recusantes in urbe detentos iudicavit. Die 21 Ianuarii quattuordecim ex eis, qui iusiurandum praestare recusabant, securi gallica necati sunt: Ioannes Baptista Turpin du Cormier, parochus Sanctissimae Trinitatis Lavallensis, Franciscanus Conventualis Ioannes Baptista Triquerie, Ioannes Maria Gallot, Iosephus Pellé, Renatus Ludovicus Ambroise, Iulianus Franciscus Morin de la Girardière, Franciscus Duchesne, Iacobus André, Andreas Duliou, Ludovicus Gastineau, Franciscus Migoret-Lamberdière, Iulianus Moulé, Augustinus Emmanuel Philippot et Petrus Thomas.
Sequentibus mensibus quattuor feminae propter fidem necatae sunt: Francisca Mézière, magistra et aegrotorum ministra, mense Februario, sorores a Caritate Ebronienses Francisca Tréhet et Ioanna Véron, mense Martio, et Maria Lhuillier, soror conversa apud Hospitalarias a Misericordia, die 25 Iunii. Iacobus Burin sacerdos, qui ministerium suum clam exercebat, mense Octobri occisus est. Undeviginti martyres a Pio XII die 19 Iunii anni 1955 inter Beatos relati sunt.







