
Synedrii membrum et Iesu discipulus occultus, a Pilato corpus Crucifixi impetravit et in suo monumento novo, in petra exciso, deposuit.
Quattuor Evangelia eum nominant. Ab Arimathaea, «civitate Iudaeorum», oriundus, erat «nobilis decurio» (Marc 15, 43), «vir bonus et iustus», qui consilio et actibus aliorum non consenserat et «exspectabat regnum Dei» (Luc 23, 50-51); Sanctus Ioannes addit eum fuisse discipulum Iesu, «occultum autem propter metum Iudaeorum» (Ioan 19, 38).
Vespere feriae sextae in Passione Domini audacter ad Pilatum introivit et corpus Iesu petiit. Cum Nicodemo eum de cruce deposuit, sindone cum aromatibus involvit et in monumento novo posuit quod sibi in petra exciderat, in horto prope Calvariam, deinde saxum magnum ad ostium advolvit (Matth 27, 57-60). Basilica Sancti Sepulcri hoc monumentum servat; sacellum Syriacum ibi sepulcra in rupe excisa ostendit, quae Iosephi ab Arimathaea et Nicodemi dicuntur. Legendae mediaevales eum Gradalis custodem et Glastoniae in Anglia apostolum fecerunt.






